La Voz manipula un texto científico e favorece as opinións pro mina para defender o uso de cianuro

Francisco Ruiz Allén, químico de Mineira de Corcoesto SL
(filial de Edgewater), na imaxe que ilustrou a entrevista
que lle fixo La Voz de Galicia, publicada en xullo do 2012

Para "el grupito" que controla o xornal non é suficiente con ofrecer información a prol do proxecto mineiro de Corcoesto e publicar continuas reportaxes na defensa dos intereses de Edgewater e das persoas beneficiadas por esta compañía, entre as que figura a esposa do director xeral de La Voz de Galicia SA, pois ademáis da longa intoxicación informativa o xornal tamén manipula artigos científicos.
Como contestación á campaña publicitaria que está a desenvolver a multinacional mineira, a Plataforma pola Defensa de Corcoesto estableceu contacto con varios expertos coa finalidade de difiundir traballos que ofreceran aos cidadáns unha visión científica do asunto, ao marxe de posicións políticas ou interesadas, para evaluar de xeito obxectivo a credibilidade ou non das argumentacións que Edgewater publicita para defender a lixiviación con cianuro.
O primeiro deses textos asinados por científicos, que foi remitido hai uns días a diferentes medios de información, é o titulado "Cianuro e minería: Moitas medias verdades interesadas", asinado por Carmen Varela, doutora en Química Orgánica.
Unha redactora de La Voz de Galicia, xornal ao que tamén foi remitido o traballo da doutora Varela, estableceu contacto cun dos dirixentes da plataforma e lle solicitou o número de teléfono da científica para consultar cuestións da linguaxe técnica, cousa que fixo, e o pasado mércores (6 de febreiro) o artigo de Varela foi publicado en La Voz.
Nembargantes, o xornal empregou as tixoras, o orixinal non foi respectado e sufriu varias manipulacións.
Non respectaron nin o título!
ExVoz ofrece copia do artigo orixinal (á dereita da ilustración insertada ao pé deste post) e tamén a reprodución facsímile do publicado en La Voz, que por riba suprimiu o creto científico da autora do artigo e non informou aos letores/as da súa condición de doutora en Química Orgánica.
A falla de ética do xornal non rematou aí, pois ao tempo que decidiu publicar o texto da científica estableceu contacto coa empresa mineira para que esta dera resposta inmediata ao artigo de Varela, pois ao día seguinte La Voz xa difundiu un texto de opinión asinado por Francisco Ruiz Allén, "responsable ambiental" de Mineira de Corcoesto SL, quen asina un texto centrado nas normas e nas medidas de seguridade que segundo el aplican as empresas mineiras que traballan con cianuro, sen entrar no debate das consideracións científicas que fai a doutora Varela.
..
(NOTA: La Voz de Galicia non avisa aos opositores á mina, nin ofrece tan xeneroso dereito á réplica, cando publica textos favorables ao proxecto de Edgewater)
.. 
Compre subliñar que Carmen Varela non ten intereses persoais nin profesionais no sector mineiro, nin tampouco obtén beneficio algún por ofrecer o seu ditame sobre o uso de cianuro; en tanto que Francisco Ruiz Allén é un profesional que sempre dependeu económicamente de empresas do sector mineiro.
O currículum de Ruiz Allén, que estudou Química na Universidade de Oviedo, é o seguinte:
Na actualidade é senior environmental manager de Edgewater Exploration, ao memso tempo que socio de Consultoría Geológica SL; e con anterioridade foi senior environmental officer en Kinbauri España SL; e xefe de laboratorio e de medioambente na compañía Río Narcea Gold Mines SL.
..

Pulsar para ampliar

----------

LIGAZÓN: Unha vez demostrada a actitude de La Voz e dalgúns dos seus xornalistas (hainos que mesmo teñen chamado ou escrito, pero non para pedir desculpas ou para ofrecer unha xustificación, senón para protestar e queixarse de que as manipulacións sexan difundidas; o que lles preocupa non é a manipulación, senón que se saiba), ofrecemos outro texto da doutora Carmen Varela que informa dalgunhas experiencias que demostran o grave impacto negativo que teñen os residuos cianurados, paga a pena ler «Cianuro e minería: verdades demostradas».

----------

LIGAZÓN á reportaxe que difunde o e-xornal Público: «La mina de oro de Corcoesto, una "bomba de relojería ambiental"», por Henrique Mariño.